最令單身港女氣餒的，莫過於見到街上的一對對錯配──男的似足Model，但女的成塊乾煎豬扒咁款；自問有幾分姿色，也不算特別「港女」，但卻偏偏淪為世紀剩女，Why？
當然，男人天生容易被靚女吸引，但若然用錯方法，話之你靚過嘉欣子淇，剩女之門依然為你打開。要成功把男，就要睇餸食飯，認清佢屬邊類型，採用相對策略，脫離單身的機會就大大增加！
幽默哥
風趣幽默的男人，識得搵有趣話題來緩和緊張氣氛，轉數夠快，話頭醒尾，唔駛偷聽都知女人心，所以多數都贏到靚女歡心。若想吸引幽默哥，就要表現得風趣，多微笑；自問搞笑道行較低者，也至少要收起平日工作時的狠樣，否則寫包單會將對方嚇到狗急跳牆。
打扮Dos & Don’ts：宜Colorful、具活力的風格，如修身短外套＋貼身背心＋Flouncy泡泡裙或性感短裙＋露踭高跟鞋。別忘記塗上鮮紅或桃紅色唇膏，引佢成晚望實你個嘴！
浪漫哥
浪漫男人喜歡送花、享受燭光晚餐；會寫窩心字條，對你呵護備至，把你寵得自以為係童話女主角。要吸引浪漫哥，就必須任由他把你寵壞，唔好睇少開門、買咖啡呢啲小事，其實在浪漫哥眼中都係份內事，而且係被需要的表現；如果一時手快自己搞掂，佢反而覺得你唔需要佢。
打扮Dos & Don’ts：喱士、花邊、真絲是散發浪漫的三大法器。燭光晚餐時，不妨以一件緊身絲質吊帶背心，襯花邊或多層喱士及膝裙。妝容方面，可嘗試清新、甜美的粉紅或珊瑚橙為主色，撲上輕薄碎粉、粉紅胭脂，再配淺粉紅唇彩，包佢會忍唔住激吻你。
好動哥
李麗珊與黃德森呢一對，說明好動哥較易被運動型女生所吸引，你至少唔好畀佢知你行幾級樓梯都會頂唔順。如果你已有十年冇做運動，唯有先培養一種較輕省的運動為習慣，如行水塘、瑜伽是不錯的選擇，因為只有運動先可以幫你直接得分。
打扮Dos & Don’ts：切忌黐假眼睫毛或成寸厚濃妝；自然色系甚或裸妝會係佢杯茶，切記要有防水及防曬功能。衣著宜簡單點，如修身剪裁的牛仔褲、絲質背心襯輕便外套；再配上舒適又女性化的鞋，譬如是平底皮鞋、短靴或矮踭涼鞋──好動男約會時好少會提議坐成日食High Tea囉！
學識哥
與聰明又見多識廣的男人約會，話題難免牽涉學術層面，搭唔上嘴只會掃興；大拋書包又冇黎氣氛。所以，你要夠聰明──唔一定要學歷高，但至少能應付唔同話題，知道王菲有幾幸福之餘，仲要知卡達菲有幾瘋狂。
打扮Dos & Don’ts：學識哥一般愛到舒適的咖啡店睇書傾計，多於夜蒲劈酒跳餐死。約會時絕不宜作過份性感火辣打扮。如相約在咖啡店見，可穿簡單的棉褲、柔軟的毛衣及平底鞋，忌用口味重或具調情效果（如鮮紅唇膏）的妝容，應以淡妝赴會。
壞帥哥
所謂「男人唔壞，女人唔愛」。呢類男士唔願意對女人作出承諾，就算拍緊拖會照date第二個，結左婚亦會照蒲天光。若你追求長久而穩定的關係，咁就咪望任何壞帥哥一眼，免得中招後萬劫不復。相反，如果你（at least自以為）夠貪玩，不妨參考下列打扮貼士。
打扮Dos & Don’ts：簡單來說，就是性感、性感及性感。請走下轉老蘭看攪Dress Code，可選無帶露肩Tube Dress，尤以Satin質料更能突出雙峰線條，但切忌太短，一來避免被誤當「搵食幫」，二來過量露底只會降格。出門必備一對斗零踭，當中以涼鞋為佳，因為腳趾都可以散發Sex Appeal。至於妝容方面，請參考壞帥哥的終極女神Kim kardashian。
哥中之哥
在任何時候或環境下，充滿男子氣概、極具自信、處事能幹、聰明醒目、實際好新……。而大部份的哥中之哥都係Gentleman，懂得欣賞及尊重女人。能夠食得住哥中之哥的女人，必須要動靜皆能，無論係跳降傘定聽歌劇，你都有膽有腦有心去陪佢嘗試，真心投入佢廣泛的興趣。
打扮Dos & Don’ts：女性化、時尚又具個人風格的女士特別容易贏得哥中之哥的青睞。在正式場合約會時，不妨穿上一襲貼身及膝裙或絲質傘裙，配襯高貴款式的高跟鞋。建議以該季流行而又配合閣下膚色的最新妝容上陣，最後以全年通行的粉紅或紫紅或紅色唇彩點綴便可。
沒有留言:
發佈留言