投資的天空：內銀重災 勿亂撈底

颱風納沙雖已於上周四下午離港而去，但上周五港股復市，對於股民來講，就像繼續打大風一樣，期指由頭跌到尾，周初近 700點的報復式反彈話咁快又無晒。
有人話期貨結算日推遲一天，但 9月份的合約卻無得買賣，搞到個市亂晒，令大戶有機可乘，睇住散戶來食。在開市後不久，當大市跌幅仍不算太大之時，不少個股已跌到一仆一碌，實際上已反映大戶當日即市造淡之心。
內銀內房股成為跌市重災區，大家都擔心內地的信貸問題會演變至如當年美國的次按風暴般嚴重。不少內房其實一直都靠高債務作槓桿來運作，市場早已認定內房股是高風險的投資，所以不作多談，較多人關心的應屬內銀股。
內銀背後問題，或並不如坊間想像般簡單，加上以圖論圖，內銀股早已跑輸大市，貿然撈底，卻越撈越低，始終唔係辦法。當然，銀行是百業之母，筆者相信上大人唔會對問題坐視不理，不過除非有無限子彈可以不停溝貨長揸唔理，否則不宜見抵就係咁買。

港股大跌前料先彈

說回大市，市場氣氛仍惡劣，投資者要錢不要貨，最明顯的例子莫過於剛上市的專業旅運（ 1235），在往時即使當日市況唔理想，但這類蚊型新股總像有抗地心吸力的能力，自行爆升兩、三成，但專業旅運大跌 25%，都咪話唔得人驚。
上周五臨收市前，自己博了認購期權，因為以大戶造法，去到這個水平不是見底反彈就有排跌，以上周五美股走勢看，這趟似乎博早咗，不過仍然相信大跌之前必先有反彈。當然，上文所講的因素不可忽視，但以連續 6個月之月線圖陰燭，相信已反映了不少，若再穿底我會選擇減持股票，如仍繼續跌，就會只保留認購期權。