如何友善地請男生「食檸檬」？

如果有個男生好鍾意你，但你對佢無興趣，點先可以好nice咁拒絕佢？

要知道，男生約你去街係需要好大勇氣，你可能覺得自己對佢嘅態度好明顯──只係想做朋友，但如果一個男仔好鍾意你，佢會說服自己你發出嘅每個「訊號」都表現你對佢有興趣。如果佢係個好人，你都唔想對佢太絕，以下係一啲tips，等你同男生say no 之餘又唔會太過hurt人。

唔好吊住佢

男生約你去街，最唔想聽到你話「等我諗諗」或「我要check吓得唔得閒」，雖然咁樣可以避免尷尬，但就等如吊住佢唔放，佢哋會覺得仲有機會，直接拒絕可以慳返對方估估吓嘅時間，所以你可以話：「我好開心你約我，但我真係無興趣。」夠晒簡單又到point！

坦白直接

另一樣男生會覺得難頂嘅就係講大話。即使你話：「我婆婆嚟探我」或「我好多嘢做」好似好有禮貌咁拒約，但都會令對方覺得遲啲可以再約你（你下個星期應該得閒）。如果對方發現你講大話，例如有其他共同朋友喺街撞到你，對方知道咗會好難受。所以，直接講你無興趣其實係比較好。

提供理由

大部分男生都會想知點解你唔鍾意佢哋，雖然「鍾意」呢樣嘢係好難解釋，但俾佢知道你拒絕嘅原因有助佢下次約女生時準備得好啲。講幾多、幾坦白就要自己衡量。如果佢勁追你，你可以話：「我覺得你好急進，但我真係唔想。」切記唔好提及佢嘅外表！你只需話：「我對你無feel。」呢個係事實，但唔至於好刻薄，佢又無得反駁。

保持低調

唔好當眾拒絕對方，亦都唔好周圍同人講！你可以同一、兩個老友傾呢件事，但唔好公告天下。如果其他男生聽到你攞追你嘅男生嚟講笑，一定會嚇走埋佢哋，包括你想佢約你嗰個！