是日噏day：呢個世界只有一種男人溝唔到女，就係...唔funny

有次同個朋友食飯講起一位common friend A君。

A君有正當職業，無不良嗜好，樣貌外表五官端正、整齊，家境仲幾好添。如果淨係講呢堆條件出嚟，非常有可能被界別為「筍盤」一類。但奇就奇在，佢已經非常多年無拍過拖。

友人談論起，覺得甚為不解。我問佢點解會覺得奇怪，佢咁樣答：

「因為若果要排邊個最似溝唔到女嘅可憐蟲，我哋識嘅人有好多都應該排先過佢。
例如B君，一年12個月有6個月都失業；
又例如C君，係有返工，但係收入之低，係正宗窮忙族；
又例如D君，成日鍾意過大海，平時買波都賭得唔細；
又例如E君，成日溝女，花弗到爆；
再例如F君，從來唔會care女朋友感受，又唔識得關心人。

所以如果你要我估邊個溝唔到女，我真係唔會估A君囉！有排都未輪到佢啦下嘛？」

呢位朋友似乎唔係太明白，平時大家會數出嚟嘅條件清單係一回事，實際又係另一回事。

無錯，你聽過好多女性數過自己嘅擇偶條件係啲咩。但你亦都應該聽過好多女仔同時會咁講：「當初唔知咩事鬼掩眼，會揀咗宜家呢個男朋友！」

咁印證左啲咩啊？印證咗女仔好多時同人拍拖，對象未必符合佢列出嘅條件，但係會有「鬼掩眼」嘅moment，莫名萌生有戀愛嘅感覺，之後就會唔記得咗之前自己所列出嘅擇偶準則。

講完一大餐，為咗令我嘅朋友更容易理解，我話：「你以前夠話女朋友胸一定要大，腳一定要幼，個樣亦都一定要夠可愛啦。你自己諗下咁多年來嗰幾個女朋友係咩款？」

咁點先能達致呢個「鬼掩眼」嘅狀態呢？個女仔開心囉！

咁女仔要開心，就必先要個男仔係有趣啦。而有趣嘅意思，當然可以係典型嘅談笑風生幽默型，但係就算你本身個人唔幽默，亦都可以好有趣。例如一個男仔如成日會做埋啲kai野，呆呆鈍鈍，本身就算冇咩幽默感，但係有好多白癡位令人發笑嘅話，都可以係有趣嘅一種。 

所以咁多種男仔，我幾乎只係見過一種男仔係真係仲係溝唔到女。

就係佢一D都唔有趣。

就算人品再差，又或者樣貌再衰嘅男仔，只要有趣，都好少話溝唔到女。
但有一種男士，偏偏要風趣幽默冇風趣幽默，同時又唔肯扮演任何「下欄位」嘅角色去引人發笑。呢種毫不有趣嘅大男人，係最典型完全溝唔到女嘅品種。

至於唔靚仔？so what？你睇呢排無線新聞個方東昇？你問D女，個個都覺得佢cute。但佢靚仔咩？no way。個格又唔花fit，但佢勝在老實中又非常識講冷笑話，不知幾多女仔鐘意。

朋友聽到呢度，似乎想突破「盲腸」，話：「咁唔驚啦，A君溝唔到女啫，如果係直接搵老婆，佢呢個品種，可能OK呢！」

我：「咁我都唔排除係OK嘅，但係冇「溝到女」嗰一步，我又唔係太理解到點會有「搵到老婆」嘅第二步出現。不過，well，遇着趕頭趕命嫁人嗰種女人，都可能會閃婚嘅，哈哈。」