《「現實」先係最強嘅愛情小三》

如果時間係最大嘅小偷，咁現實就係最大嘅小三。

愛情最容易輸畀嘅係現實，因為不切實際嘅愛情其實逃避唔到現實嘅追逐，而身處香港呢個社會嘅我哋就更加無法逃避現實。

「現實」可以指錢、婚姻、年齡、家庭壓力等等，而好多愛情最後失敗都係因為被現實擊倒。喺理想世界入面，人類係應該不理一切去追尋真愛，但係事實係大部分人都唔淨係想要愛情，而係希望愛情同麵包一齊擁有。

最純真嘅愛情只會係讀書天真時期擁有，因為去到大個你就知道唔係愛就夠，原來仲要去面對生活、仲要儲錢買樓結婚生仔等等一啲不能不現實嘅課題等緊你。貧錢夫妻百事哀，因為喺香港無錢就係煩惱，現實真係會蠶食你嘅愛情。

長大咗先會發現原來錢係愛情中係佔一席位，無錢連將來都唔敢諗。長大咗先會發現原來年齡一齊追住愛情跑，去到接近三十歲你唔能夠唔考慮進入另一階段。長大咗先會發現愛其實解決唔到所有問題，唔係拖住手用念力集氣就一切迎刃而解。現實本來就係生活一部分，無辦法忽視。

唔想輸畀現實，就只有跟現實賽跑，面對現實去搵多啲麵包去餵飼你嘅愛情。

愛情。。。從來都是奢侈品。😖

from

https://hk.style.yahoo.com/%E7%8F%BE%E5%AF%A6-%E5%85%88%E4%BF%82%E6%9C%80%E5%BC%B7%E5%98%85%E6%84%9B%E6%83%85%E5%B0%8F%E4%B8%89-1605481384304694.html