男人話齋#008：有啲時候，我一個人坐喺茶記食火腩飯

唔記得邊個聖人講過，令人類最開心嘅兩件事，係食嘢同__嘢。__嘢唔會日日做 （除咗初初識嗰陣），但係食嘢喺兩個人嘅關係裡面，係day day都要做，仲可能一日三次，重要過__嘢好多。

眾所周知嘅「火腩飯潮文」係一個男人對女朋友s淨係識得食日本嘢嘅控訴。老老實實，好多香港女仔唔知點解勁鍾情日本嘢，唔係話日本嘢唔好食，都唔使食得咁密啩你又唔係日本妹！呢排興拉麵，就間間都要試勻，走勻遍全港18區，搞到拍拖好似拍飲食節目咁。

啲男人又得意個喎，可以一日三餐都喺同一間茶記、午晚餐都係叫火腩飯，如果早餐有火腩通佢哋都應該會照單全收百食不厭咁款。

咁樣有乜法子唔嘈交？

香港已經係一個所謂美食天堂，中英意法日格陵蘭愛斯基摩菜都任君選擇，又有openrice嗰類app指點迷津，點解諗食乜仍然係咁難？我試過同一個Ex落街搵食，前後行咗三個地鐵站咁遠嘅距離，結果都係「返屋企樓下嗰間算喇」。行都已經行到一肚氣，嗰餐飯梗係背脊骨落。

之後我仲要俾佢話「冇主見」、「食餐飯都話唔到事」。喂阿姐！係邊個話「我冇所謂」、但係間間都話唔好？食過嘅又話食過、新開嘅又話驚唔好食、泰國嘢又話辣食齋又話寡。我知，去食buffet實冇死實有菜式啱食，不過我個荷包已經俾屋租寬頻手機水電煤同港鐵等等各大公司大機構當buffet咁蠶食緊呢！

去食日本嘢冇死喇啩？「我嚟M呀你仲叫我食生冷嘢？」而佢明明尋晚先至去咗買雪糕for今晚食。

所以，無論男女，唔該真係冇所謂時先至好話冇所謂，因為食嘢，真係日日都要，每日諗食乜嘢時都要嗌霎一輪，點會吸收？吸收唔到營養，個人又點會有主見？

各位飲食男女，諗到今晚食乜未？

from

http://hk.lifestyle.yahoo.com/blogs/relationship-love-tower/%E7%94%B7%E4%BA%BA%E8%A9%B1%E9%BD%8B-008-%E6%9C%89%E5%95%B2%E6%99%82%E5%80%99-%E6%88%91-%E5%80%8B%E4%BA%BA%E5%9D%90%E5%96%BA%E8%8C%B6%E8%A8%98%E9%A3%9F%E7%81%AB%E8%85%A9%E9%A3%AF-112101886.html